's Maibaamaufstelln
A oida Brauch, des Maibaamstain,
laßts euch de Hetz net nehma
und laßts euch net um d'Brotzeit prain,
ihr brauchts a Kraft zum Stemma.
Gehts zuawa gschwind, iatzt werd er ghobn,
habts in de Irxn Schmoiz?
Schee langsam d'Schweiben nochegschobn,
na rutscht er nei in Foiz.
Am Anfang do gehts freili zaach,
do oiwei leichta gehts.
A kloana Ruck no, fei net zgaach,
damit er schee grod steht.
Wenn er na aufgricht vor euch is
na derfts an Juchiza doa,
denn nachad wißts as gwiß
er ko euch nix mehr doa.
Fest einigspannt in d'Zang,
na ko da Wind scho waahn.
Er staand mit Sicherheit net lang
kunnt er sich iatzt no draahn.
Dann werd er aufzaamt mit am Kranz,
Figurn no, Daxn, Blattl.
Musikantn spuits zum Maitanz,
aufgehts Buam und Madl!
* * *
A Maibaam der net gstohln worn is
der bringt koa Glück, koa Freid,
drum deads ma niea den Brauch vagessn,
es junga Trachtlaleut!
|